حجاج کرام کی واپسی کا سلسلہ اختتام پذیر۔ سعودی ایر لائن کی آخری پرواز سے401حاجیوں کی دہلی واپسی۔ حکومت ہند کی کوششوں سے حج 2025 سہولیات سے بھرپور رہا۔کوثر جہاں۔
نئی دہلی،9جولائی(پریس ریلیز)شمالی ہندوستان کے سب سے بڑے حج امبارکیشن پوائنٹ،دہلی سے مقدس حج بیت اللہ کے لیے روانہ ہونے والے ملک کی سترہ ریاستوں کے حجاج کرام کی حج بیت اللہ کی ادائیگی کے بعد واپسی کا سلسلہ آج دہلی کے اندرا گاندھی انٹرنیشنل ایرپورٹ پر سعودی ایر لائن کی پرواز نمبرSV-3082 سے401حاجیوں کی وطن آمد کے ساتھ ہی اختتام پذیر ہو گیا۔ آخری پرواز سے وطن واپس آنے والے حجاج کے استقبال کے لیے دہلی ایر پورٹ پر حج کمیٹی کی چیئر پرسن کو ثر جہاں،ممبر محمد سعد، ایکزکٹیو آفیسر اشفاق احمد عارفی،ڈپٹی ایگزیکٹو آفیسر محسن علی،حج کمیٹی کے اسٹاف اور ایرپورٹ کی ایجینسیوں ڈائل، سی آئی ایف اور سعودی ایر لائن کے افسران موجود تھے۔سبھوں نے آخری حج فلائٹ سے واپس آنے والے حاجیوں کا پرجوش خیرمقدم کیا۔
اس موقع پر دہلی اسٹیٹ حج کمیٹی کی چیئر پرسن کو ثر جہاں نے حج 2025 کے لیے خدمات فراہم کرنے والی تمام ایجنسیوں اور ان کے افسران اور اسٹاف کو ان کی پرخلوص خدمات کے لیے شکریہ ادا کیا۔انہوں نے اس سال حج کے دوران حجاج کو فراہم قابل تحسین انتظامات اور سہولیات کے لیے حکومت سعودیہ عربیہ اور اس کی وزارت حج و عمرہ کی کارکردگی کو بھی تعریف و تحسین کی حق دار قرار دیتے ہوئے بتایا کہ یہ سب وزیراعظم نریندر مودی کی قیادت میں حکومت ہند کی وزارت اقلیتی امور اور اس کے فعال اور متحرک وزیر جناب کرین ریجیجو کی سربراہی اور حج امور سے ان کی پرخلوص اور لائق مبارک باد دلچسپی اور سروکار کا نتیجہ ہے۔ اس موقع پر انہوں نے اس امید اور یقین کا بھی اظہار کیا کہ اب جبکہ 7 جولائی سے حج 2026 کے لیے درخواست فارم جمع کرنے کا سلسلہ شروع ہو چکا ہے،یقینی طور پر آیندہ حج اور بھی زیادہ بہتر بلکہ قابل مثال ہوگا۔
دلی اسٹیٹ حج کمیٹی کے ایگزیکٹو آفیسر اشفاق احمد عارفی نے اس سلسلے میں دفتری تفصیلات جاری کرتے ہوے بتایا کہ اس سال دہلی امبارکیشن پوائنٹ کے حج بیت اللہ کے لیے روانہ ہونے والے کے 15069 حجاج میں دہلی کے 2862،اتر پردیس سے 8036,اتراکھنڈ کے 904، ہریانہ کے 1190، پنجاب کے 310،ہماچل پردیس کے 70، چنڈی گڑھ کے 38، بہار کے 746،جموں کشمیر کے 480،جھارکھنڈ کے70،راجستھان کے 262،مہاراشٹر کے 04،کرناٹک کے 14، چھتیس گڑھ کے 02، آسام کے 09، مدھیہ پردیش کے 74،مغربی بنگال کے13 اور اوڈیشہ کے 05 حجاج شامل تھے۔ ان تمام حجاج میں مرد حجاج کی تعداد 8037 اور خواتین کی تعداد 7032 تھی۔
حج بیت اللہ کے اختتام کے بعد وطن واپس آنے والے حجاج کرام کی وطن واپسی دو مرحلوں میں ہوئی۔ پہلے مرحلے میں 16 پروازوں کے ذریعے مکہ مکرمہ براہ جدہ سے جبکہ دوسرے مرحلے میں 21 پروازوں کے وطن واپس آنے والے حجاج کی واپسی مدینہ منورہ سے ہوئی۔ ان میں 51 بنا محرم خواتین اور 19 اسٹیٹ حج انسپکٹر بھی شامل ہیں۔
