ضلع کا 52واں یوم تاسیس شان و شوکت سے منایا گیا
محمد صدر عالم نعمانی سیتامڑھی۔
ضلع کے 52 ویں یوم تاسیس کی تقریب کا اہتمام بڑے جوش و خروش کے ساتھ کیا گیا۔ یوم تاسیس کے موقع پر منعقدہ پروگرام کا آغاز صبح سویرے پربھات پھیری کے ساتھ اسکول کے طلباء، اساتذہ اور عہدیداروں نے کیا۔ یوم تاسیس کے موقع پر اپنے خطاب میں ضلع مجسٹریٹ منیش کمار مینا نے یوم تاسیس پر ضلع کے تمام باشندوں کو دلی مبارکباد پیش کی۔ اپنے خطاب میں انہوں نے کہا کہ مجھے یہ کہتے ہوئے بے حد خوشی ہو رہی ہے کہ ہمارا ضلع ملک اور ریاست کے ساتھ ساتھ ترقی کی طرف گامزن ہے۔ ضلع مجسٹریٹ نے اپنے خطاب میں کہا کہ ہمارے ضلع میں امن قائم رہنا چاہیے۔ ہماری خواہش ہے کہ سیتامڑھی آپسی بھائی چارے، محبت اور سماجی ہم آہنگی کے میدان میں ایک مثال بنے۔ انہوں نے امید ظاہر کی کہ ضلع کی ہمہ جہت ترقی ہوگی اور ہمارا ضلع مزید ترقی کی راہ پر گامزن ہوگا۔ ڈمرہ ہوائی اڈہ کے میدان میں مختلف محکموں کی طرف سے لگائی گئی ترقیاتی نمائش کا ڈسٹرکٹ مجسٹریٹ اور معزز عوامی نمائندوں نے معائنہ کیا۔ تعلیم، صحت، زراعت، آئی سی ڈی ایس، ذریعہ معاش، ڈی آر سی سی، دیہی ترقی، امتناعی، ٹرانسپورٹ، الیکشن ڈیپارٹمنٹ سمیت 2 درجن سے زائد محکموں نے اپنے اسٹال لگائے تھے۔ اس موقع پر کبڈی، کھو کھو اور ویٹ لفٹنگ کے مقابلے بھی منعقد کیے گئے۔ ڈسٹرکٹ مجسٹریٹ نے تمام کھلاڑیوں کی حوصلہ افزائی کی۔ یوم تاسیس کے موقع پر اردو مشاعرہ و ورکشاپ کا بھی انعقاد کیا گیا جس میں ضلع کے نامور شعراء نے اپنی شاعری، غزلوں اور نظموں کی شاندار پیشکش کی۔ اس موقع پر ثقافتی پروگرام بھی منعقد کیا گیا جس میں ضلع کے مقامی فنکاروں کی جانب سے نغمے اور موسیقی پیش کی گئی۔ ثقافتی پروگرام میں بہار گیت، جھیجھیا، سیتا جنم کتھا، کجری بھوجپوری اور میتھلی گیتوں پر مبنی گیت فنکاروں کی جانب سے پیش کیے گئے ۔
