محمد صدر عالم نعمانی پٹنہ
بہار میں جاری سیاسی اتھل پتھل کے درمیان بی جے پی اور جے ڈی یو دونوں میں سرگرمیاں تیز ہوگئی ہیں۔ عظیم اتحاد حکومت میں سب کچھ ٹھیک نہ ہونے کے اشارے کے درمیان جہاں بی جے پی نے ریاست بہار کی ہائی کمان کو دہلی طلب کیا ہے وہیں دوسری طرف وزیر اعلی نتیش کمار نے بھی اپنی پارٹی کے سینئر لیڈروں کو پٹنہ میں اپنی رہائش گاہ پر بلایا ہے۔
جمعرات کی شام بی جے پی کے ریاستی صدر سمرات چودھری اور سابق نائب وزیر اعلیٰ رینو دیوی دونوں اچانک دہلی کے لیے روانہ ہو گئے، وہیں دوسری طرف ایک انے مارگ پر واقع سی ایم کی رہائش گاہ میں بھی سرگرمیاں تیز ہو گئی ہیں۔ معلومات کے مطابق جے ڈی یو کے ریاستی صدر امیش کشواہا، پارٹی کے سابق قومی صدر اور ایم پی للن سنگھ، بہار کے کابینہ وزیر سنجے جھا اور پارٹی کے دیگر بڑے لیڈران وزیر اعلیٰ نتیش کمار کے ساتھ پٹنہ کے سی ایم ہاؤس میں موجود ہیں اور ایک میٹنگ کر رہے ہیں۔
اگرچہ اس ملاقات کے حوالے سے تصویر ابھی تک واضح نہیں ہے لیکن دونوں جماعتوں میں بڑھتی ہوئی سرگرمی اور بیک وقت پارٹی رہنماؤں کی ملاقات اپنے آپ میں بہت کچھ بتا رہی ہے۔ اس دوران پٹنہ میں سی ایم نتیش کمار کی رہائش گاہ کی سیکورٹی بھی بڑھا دی گئی ہے۔
